Mamma, ‘stu cori miu lazzariatu
pri ‘nganni e tradimenti e pri scunforti,
st’amaru e afflittu cori, cunsacratu
lu vogghiu sulu a Tia, finu a la morti.
Chiù di ‘na bedda mi l’ha fracassatu
a corpu di cuteddu, forti forti,
ora l’affidu a Tia, pirch’è malatu,
pirchi a Tia sula premi la me’ sorti.
A Tia, ca sì la megghiu amanti mia,
la vera amanti, china di ducizzi,
senza capricci, tutta puisia,
a Tia ca non mi vinni li carizzi,
ca m’ami pri daveru, Mamma, a Tia,
ca sì custanti e non hai fintizzi.